ಭರತಮುನಿ ಜಯಂತ್ಯುತ್ಸವ

🖋️ಲೇಖನ : ಡಾ. ದ್ವಾರಕನಾಥ್

ಉಡುಪಿ ಶ್ರೀ ಕೃಷ್ಣ ಮಠದ ರಾಜಾಂಗಣದಲ್ಲಿ ಪರ್ಯಾಯ ಶ್ರೀ ಪುತ್ತಿಗೆ ಮಠ ಶ್ರೀ ಶ್ರೀ ಶ್ರೀ ಸುಗುಣೇಂದ್ರ ತೀರ್ಥ ಶ್ರೀಪಾದಂಗಳವರ ಆಶೀರ್ವಾದಗಳೊಂದಿಗೆ ರಾಧಾಕೃಷ್ಣ ನೃತ್ಯ ನಿಕೇತನದವರಿಂದ 23ನೇ ವರ್ಷದ ಭರತಮುನಿ ಜಯಂತ್ಯುತ್ಸವವು ಮುಂಜಾನೆಯಿಂದ ರಾತ್ರಿಯವರಗೂ ವಿಜೃಂಭಣೆಯಿಂದ ಆಚರಿಸಲ್ಪಟ್ಟಿತು.

ಉಡುಪಿಯ ಕೃಷ್ಣ ಮಠದ ರಥಬೀದಿಯಲ್ಲಿ ಮುಂಜಾನೆ ರಾಧಾಕೃಷ್ಣ ನೃತ್ಯ ನಿಕೇತನದ ಸಕಲ ವಿದ್ಯಾರ್ಥಿಗಳು, ತಮ್ಮ ಪೋಷಕರು ಹಾಗೂ ಬಂದಂತಹ ಸಕಲ ಅತಿಥಿ ಅಭ್ಯಾಗತರೊಡಗೂಡಿ ನಟರಾಜ ಹಾಗೂ ನಾಟ್ಯಶಾಸ್ತ್ರವನ್ನು ಹಿಡಿದು ಮೆರವಣಿಗೆಯನ್ನು ನಡೆಸಿದರು.

ತದನಂತರ ರಾಜಾಂಗಣದಲ್ಲಿ ಪರ್ಯಾಯ ಶ್ರೀ ಪುತ್ತಿಗೆ ಮಠಧೀಶರಾದ ಶ್ರೀ ಶ್ರೀ ಶ್ರೀ ಸುಗುಣೇಂದ್ರ ತೀರ್ಥ ಶ್ರೀಪಾದಂಗಳವರರಿಂದ ಭರತಮುನಿ ಜಯಂತ್ಯುತ್ಸವದ ಉದ್ಘಾಟನೆ ನಡೆಯಿತು. ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಶ್ರೀ ವೇದಮೂರ್ತಿ ಕೆ ಪದ್ಮನಾಭ ಭಟ್ ಕಿದಿಯೂರು ವಹಿಸಿದ್ದರು, ವಿದುಷಿ ರೋಹಿಣಿ ಉದಯ್ ಪುತ್ತೂರು ಅವರು ಅತಿಥಿಯಾಗಿ ಆಗಮಿಸಿದ್ದರು.

ಈ ಭರತಮುನಿ ಜಯಂತ್ಯುತ್ಸವದ ಸುಸಂದರ್ಭದಲ್ಲಿ ಕರ್ನಾಟಕ ಕಲಾಶ್ರೀ ಡಾ. ಎಸ್ ಕೇಶವ ಕುಮಾರ್‌ ಪಿಳ್ಳೆ ಶಿವಮೊಗ್ಗ, ಹಾಗೂ ಗುರು ವಿದ್ಯಾನ್ ಬಾಲಕೃಷ್ಣ ಬಿ. ಮಂಜೇಶ್ವರ್. ಅವರು ಭರತ ಪ್ರಶಸ್ತಿಯನ್ನು ಪಡೆದರು ಹಾಗೂ ರಮನಾ ಇವಟೆ ಪರರಾ, ಮಂಗಳೂರು ಹಾಗೂ ಉಡುಪಿಯ ವಿದುಷಿ ದೀಕ್ಷಾ ಅವರು ಕಲಾರ್ಪಣ ಪ್ರಶಸ್ತಿ ತಮ್ಮದಾಗಿಸಿಕೊಂಡರು. ಇದೇ ಸಂಸ್ಥೆಯ ವಿದ್ಯಾರ್ಥಿಗಳಾದ ವಿದುಷಿ ಮೇಧಾ ತಂತ್ರಿ, ವಿದುಷಿ ಶ್ರೀಮತಿ ಮೇಘನಾ ಭಟ್, ವಿದುಷಿ ಸಿಂಚನಾ ಜಿ.ಕೆ., ವಿದುಷಿ ಶ್ರಾವ್ಯ ರಾವ್, ವಿದುಷಿ ಸಹನಾ ದೀಪ್ತಿಯವರು ಗುರು ರಾಧಾಕೃಷ್ಣಾನುಗ್ರಹ ಪ್ರಶಸ್ತಿಯ ಪಾತ್ರರಾದರು.

ಸಭಾಕಾರ್ಯಕ್ರಮದ ನಂತರ ರಾಧಾಕೃಷ್ಣ ನೃತ್ಯ ನಿಕೇತನದ ಶಿಷ್ಯ – ಪ್ರಶಿಷ್ಯರಿಂದ ಕಾರ್ಯಕ್ರಮವು ನಡೆಯಿತು. ವಿದುಷಿ ಸುಶ್ಮಿತಾ ಗಿರಿರಾಜ್, ವಿದುಷಿ ಶ್ರೀವಿದ್ಯಾ ಸಂದೇಶ್ ಹಾಗೂ ವಿದುಷಿ ಶ್ರೀ ಕಲ್ಯಾಣಿ ಜೆ ಪೂಜಾರಿಯವರು ತಮ್ಮ ಶಿಷ್ಯರೊಡಗೂಡಿ ಅತ್ಯದ್ಭುತವಾದ ಕಾರ್ಯಕ್ರಮವನ್ನು ರಮಣೀಯವಾಗಿ ಪ್ರದರ್ಶಿಸಿದರು; ಮಧ್ಯಾಹ್ನ ಇದೇ ಸಂಸ್ಥೆಯ ವಿದ್ಯಾರ್ಥಿನಿಯರಿಂದ ನೃತ್ಯ ಸಿಂಚನಾ” ಕಾರ್ಯಕ್ರಮವು ಬಹಳ ಸುಂದರವಾಗಿ ಮೂಡಿ ಬಂದರೆ,

ಸಾಯಂಕಾಲದ “ನೃತ್ಯಾಭಿಷೇಕಂ” ಕಾರ್ಯಕ್ರಮವು ಸಂಸ್ಥೆಯ ಶಿಷ್ಠೆಯರಿಂದ ಕೂಚುಪುಡಿಯ ಲಾಲಿತ್ಯಮಯವಾದ ಮೆರಗನ್ನು ಹೊರ ಹೊಮ್ಮಿಸಿತು. ಶ್ರೀರಂಗನನ್ನು ವಿಧವಿಧವಾಗಿ ಬಣ್ಣಿಸುವ ನೃತ್ಯದೊಂದಿಗೆ ಕಾರ್ಯಕ್ರಮವನ್ನು ಆರಂಭಗೊಳಿಸಿ, ನಂತರ ರಾಮಾಯಣವನ್ನು ಬಣ್ಣ ಬಣ್ಣವಾಗಿ ಬಣ್ಣಿಸುವ ರಾಮಾಯಣ ಶಬ್ದಂ ಅನ್ನು ಪ್ರದರ್ಶಿಸಲಾಯಿತು. ಶಿವ – ಪಾರ್ವತಿಯರ ಆನಂದ ತಾಂಡವವು ಕಲಾಭಿಮಾನಿಗಳ ಪೂರ್ಣ ಗಮನ ಸೆಳೆದರೆ, ಇಲ್ಲಿಂದ ಮುಂದುವರಿದ ಅರ್ಧನಾರೀಶ್ವರ ನೃತ್ಯ ಪ್ರದರ್ಶನವು ಶಿವ ಹಾಗೂ ಶಕ್ತಿಯ ಎರಡೂ ಭಾವಗಳನ್ನು ಎಲ್ಲರಿಗೂ ತಲುಪಿಸುವಲ್ಲಿ ಫಲಕಾರಿಯಾಗಿತ್ತು. ದುರ್ಗೆ ಎಂಬ ದೇವಿಯ ವರ್ಣನ ಪ್ರಸ್ತುತಿಯಲ್ಲಿ ಮಹಿಷಾಸುರನ ಸಂಹಾರವು ಪ್ರತಿಯೊಬ್ಬರಿಗೂ ಮನಸ್ಸಿಗೆ ಮುಟ್ಟುವಂತೆ ಮೂಡಿಬಂತು.

ಈ ಕಾರ್ಯಕ್ರಮದ ಹಿಮ್ಮೇಳದಲ್ಲಿ ಹಾಡುಗಾರಿಕೆ, ನಟುವಾಂಗ ಮತ್ತು ನೃತ್ಯ ನಿರ್ದೇಶನದಲ್ಲಿ ಈ ಸಂಸ್ಥೆಯ ನೃತ್ಯ ಗುರುಗಳಾದ ವಿದುಷಿ ವೀಣಾ ಮುರಲೀಧರ ಸಾಮಗ ಅವರು ತಮ್ಮ ವಿದ್ವತ್ ಅನ್ನು ತೋರಿದರೆ, ವಯೋಲಿನ್ ನಲ್ಲಿ ವಿದ್ಯಾನ್ ಶ್ರೀಧರ್ ಆಚಾರ್ಯ, ಮೃದಂಗದಲ್ಲಿ ವಿದ್ಯಾನ್ ಮನೋಹ‌ರ್ ರಾವ್ ಮಂಗಳೂರು, ರಿದಂ ಪ್ಯಾಡ್‌ನಲ್ಲಿ ವಿದ್ಯಾನ್ ಕಾರ್ತಿಕ್ ಇನ್ನಂಜೆಯವರು ತಮ್ಮ ಕಲಾನೈಪುಣ್ಯತೆಯಿಂದ ಕಾರ್ಯಕ್ರಮವನ್ನು ಮೆರಗುಗೊಳಿಸಿದರು. ವರ್ಣಾಲಂಕಾರದಲ್ಲಿ ವಿದುಷಿ ಸುಶ್ಮಿತಾ ಗಿರಿರಾಜ್, ಹರೀಶ್ ಬ್ರಹ್ಮಾವರ ಮತ್ತು ಶ್ರೀ ವಿಜೇಶ್ ಸಹಕರಿಸಿದರು.