ಶೋಷಣೆಗೆ ಸೊರಗಿದ ಶೋಷಿತ ಸಮುದಾಯ. ಇನ್ನಾದರೂ ಸಂವಿಧಾನ ಬದ್ಧ ಹಕ್ಕನ್ನು ಪಡೆದುಕೊಳ್ಳಲು ಸಮುದಾಯ ಒಗ್ಗಟ್ಟಾಗಿ ಬೀದಿಗಿಳಿದು ಹೋರಾಟ ನಡೆಸದಿದ್ದರೆ ಬದುಕು ಬೀದಿ ಪಾಲಾಗುವುದರಲ್ಲಿ ಯಾವುದೇ ಸಂಶಯವಿಲ್ಲ.
ಬ್ರಿಟಿಷರು ಭಾರತ ಬಿಟ್ಟು ಹೋಗಿ ಎಂಬತ್ತು ವರ್ಷಗಳೇ ಕಳೆದರೂ ಶೋಷಿತ ಸಮುದಾಯಕ್ಕೆ ಕನಿಷ್ಠ ಪಕ್ಷ ವಾಸಿಸಲು ಭೂಮಿ ಒದಗಿಸಿ ಕೊಡಲು ಇಲ್ಲಿಯವರೆಗೆ ಆಡಳಿತ ನಡೆಸಿದ ಸರಕಾರಗಳು ವಿಫಲವಾಗಿವೆ. ಹಾಗಾಗಿ ನೆಲೆ ಇಲ್ಲದ ಶೋಷಿತ ಸಮುದಾಯಕ್ಕೆ ನೆಲೆ ನಿಲ್ಲಲು ಒಂದಿಷ್ಟು ನೆಲ.. ನೆತ್ತಿಯ ಮೇಲೊಂದು ಸೂರು.. ಒದಗಿಸಿ ಕೊಡುವುದು ರಾಜ್ಯ.. ಜಿಲ್ಲೆಗಳ ದಲಿತ ಚಳುವಳಿಯ ಹೋರಾಟದ ಮುಖ್ಯ ಭಾಗವಾಗಬೇಕು.
ಹೌದು ಇಂದು ಜಿಲ್ಲೆಯಲ್ಲಿ ಅನೇಕ ಶೋಷಿತ, ನಿರ್ಗತಿಕ ದಲಿತ ಕುಟುಂಬಗಳನ್ನು ಕಾಡುವ ಸಮಸ್ಯೆ ಇದು. ಇಂದಿಗೂ ಕೇವಲ* *ವಾಸಿಸಲು ತುಂಡು* *ಭೂಮಿಗಾಗಿ*
*ಜನಪ್ರತಿನಿಧಿಗಳ ಬಳಿ ಭಿಕ್ಷೆ ಬೇಡುತ್ತಿದ್ದಾರೆಂದರೆ ನಾವು ನೀವು ನಂಬಲೇಬೇಕು! ದಲಿತರ ಮತ ಪಡೆದ ಯಾವುದೇ ಸರಕಾರ ಅದೆಷ್ಟು ವರ್ಷಗಳ ಕಾಲ ಅಧಿಕಾರ ನಡೆಸಿದರೂ ಶೋಷಿತ ಸಮುದಾಯದ ಕುಟುಂಬಗಳಿಗೆ ಇಂದಿಗೂ ನೆಲ, ನೆಲೆ ಕಲ್ಪಿಸುವಲ್ಲಿ ಅವರನ್ನು ಸಮಾಜದ ಮುಖ್ಯ ವಾಹಿನಿಗೆ ತರುವಲ್ಲಿ ವಿಫಲವಾಗಿವೆ.
ಅಧಿಕಾರಿಗಳಿಗೆ ಮತ್ತು ಜನ ಪ್ರತಿನಿಧಿಗಳಿಗೆ ಈ ಶೋಷಿತ ಸಮುದಾಯ ಕಂಡರೆ ಅಕ್ಕರೆಗಿಂತ ಅಸಡ್ಡೆಯೇ ಹೆಚ್ಚು. ಕೇವಲ ಮತಕ್ಕಾಗಿ ಇವರನ್ನು ಮಾತ ನಾಡಿಸುತ್ತಾರೆಯೇ ಹೊರತು ಮಮತೆಯಿಂದಲ್ಲ. ಉಡುಪಿ ಜಿಲ್ಲೆಯಲ್ಲಿ ಲಭ್ಯ ಸರಕಾರಿ ಭೂಮಿ ಇಲ್ಲವೆಂದಲ್ಲ. ಡಿಸಿ ಮನ್ನಾ ಭೂಮಿ..ಕುಮ್ಕಿ ಹೆಸರಿನ ಸರಕಾರಿ ಭೂಮಿ ಮತ್ತು ಪಕ್ಕಾ ಸರಕಾರಿ ಭೂಮಿ ಸಾಕಷ್ಟು ಇದೆ. ಉದ್ಯಮಿಗಳಿಗೆ ನೂರಾರು.. ಸಾವಿರಾರು ಎಕರೆ ಭೂಮಿ ಯಾವುದೇ ಕಾನೂನಿನ ತೊಡಕು ಇಲ್ಲದೆ ತಕ್ಷಣ ದೊರಕುತ್ತದೆ. ಆದರೆ ದಲಿತರ ವಿಷಯಕ್ಕೆ ಬಂದರೆ ಡೀಮ್ಡ್ ಫಾರೆಸ್ಟ್, ಪಟ್ಟಣ ಪಂಚಾಯತ್, ನಗರ ಸಭಾ ವ್ಯಾಪ್ತಿ, ಮೀಸಲು ಅರಣ್ಯ ಪ್ರದೇಶ, ಸ್ಥಳೀಯಾಡಳಿತ ಮತ್ತು ಸರಕಾರಕ್ಕೆ ಅವಶ್ಯಕತೆ ಇರುವ ಸ್ಥಳ.. ಹೀಗೆ ನಾನಾ ಕಾರಣಗಳನ್ನು ನೀಡಿ ಸಲ್ಲಿಸಿದ ಅರ್ಜಿಗಳನ್ನು ತಿರಸ್ಕರಿಸಲಾಗುತ್ತದೆ.
ಅದೂ ಅಕ್ರಮ ಸಕ್ರಮ ಸಮಿತಿ ಅಧ್ಯಕ್ಷರುಗಳಾದ ಮಾನ್ಯ ಶಾಸಕರುಗಳ ಉಪಸ್ಥಿತಿಯಲ್ಲಿಯೇ ಅನ್ನುವುದು ಕಟು ಸತ್ಯ! ಅದರಲ್ಲೂ ಜಿಲ್ಲೆಯಲ್ಲಿ ದಲಿತ ಕುಟುಂಬಗಳು 94/c/ 94cc/ ನಮೂನೆ 50/ 53/ ರ ಅಡಿಯಲ್ಲಿ ಸಕ್ರಮಕ್ಕೆ ಸಲ್ಲಿಸಿದ ಅರ್ಜಿಗಳು ಸುಮಾರು ಮೂವತ್ತು ನಲವತ್ತು ವರ್ಷಗಳಿಂದ ರದ್ದುಗೊಳ್ಳುತ್ತಿವೆ, ತಿರಸ್ಕರತವಾಗುತ್ತಿವೆ ಮತ್ತು ತಡೆಹಿಡಿಯಲ್ಪಡುತ್ತಿವೆ! ಕಾರಣ ನಿಗೂಢ!
ಅಚ್ಚರಿ ಎಂದರೆ ಇದೇ ಅಕ್ರಮ ಸಕ್ರಮ ಯೋಜನೆಯಡಿಯಲ್ಲಿ ಹಣ ಬಲ, ಜಾತಿ ಬಲ, ರಾಜಕೀಯ ಬಲವುಳ್ಳ ಕೆಲವೊಂದು ಬಲಾಡ್ಯರು ಸಲ್ಲಿಸಿದ ಅರ್ಜಿಗಳು ಸಮಿತಿಯ ಎದುರು ವಿಚಾರಣೆಯಾಗದೆ ಬೈಠಕ್ ನಡೆದ ದಿನಾಂಕವನ್ನೇ ನಮೂದಿಸಿ ಸದ್ದಿಲ್ಲದೆ ಎಕರೆಗಟ್ಟಲೆ ಭೂಮಿ ಮಂಜೂರಾದ ಉದಾಹರಣೆ ಜಿಲ್ಲೆಯಲ್ಲಿ ಸಾಕಸ್ಟಿವೆ.ಆದರೆ ಜಿಲ್ಲೆಯಲ್ಲಿ ಶೋಷಿತರಿಗೆ ಮಾತ್ರ ಕಿಂಚಿತ್ ಭೂಮಿ ದಕ್ಕುವುದೇ ಇಲ್ಲ. ಹಾಗೆಯೇ ಮೀಸಲಾತಿ ವಿಷಯಕ್ಕೆ ಬಂದರೆ ಸಮುದಾಯದ ಮಕ್ಕಳಿಗೆ ಸಿಗುವ ವಿದ್ಯಾರ್ಥಿ ವೇತನಗಳಿಂದ ಹಿಡಿದು ಉನ್ನತ ಶಿಕ್ಷಣ, ಉನ್ನತ ಮಟ್ಟದ ಉದ್ಯೋಗ ಕೂಡ ಮರೀಚಿಕೆಯೇ! ಸರಕಾರದಿಂದ ಸಿಗುವ ಸೌಲಭ್ಯ, ಸ್ವ ಉದ್ಯೋಗಕ್ಕೆ ಸಿಗುವ ಬ್ಯಾಂಕ್ ಸಾಲ, ಸಬ್ಸಿಡಿ ಕಠಿಣ ನಿಯಮಗಳಿಂದಾಗಿ ಇವರ ಪಾಲಿಗೆ ಕಬ್ಬಿಣದ ಕಡಲೆಕಾಯಿ. ಶೋಷಿತ ಜನರ ಮಾತಿಗೆ, ಬೇಡಿಕೆಗೆ, ಬದುಕಿಗೆ ಬೆಲೆಯೇ ಇಲ್ಲದಂತಾಗಿದೆ. ಇದು ಜಿಲ್ಲೆಯಲ್ಲಿ ಅಧಿಕಾರಿಗಳ ಮೂಲಕ ಕಾನೂನು ರೀತಿಯಲ್ಲಿಯೇ ಶೋಷಿತ ಸಮುದಾಯದ ಮೇಲೆ ನಡೆಯುತ್ತಿರುವ ವ್ಯವಸ್ಥಿತ ಪಿತೂರಿ, ಶೋಷಣೆ, ದಬ್ಬಾಳಿಕೆ ಅಂದರೆ ತಪ್ಪಾಗಲಾರದು.! ಬಡವರ, ಶೋಷಿತರ ನಿರ್ಗತಿಕರ ಕಡೆಗಣನೆ ಅಕ್ರಮ ಸಕ್ರಮ ಸಮಿತಿಯ ಅಧ್ಯಕ್ಷರ ಮತ್ತು ಸದಸ್ಯರ ಎದುರೇ ನಡೆಯುತ್ತಿದೆ ಎಂದರೆ ಸರಕಾರದಿಂದ ರಚಿಲ್ಪಟ್ಟ ಸಮಿತಿಗೆ ಬೆಲೆ ಎಲ್ಲಿದೆ?
ಶ್ರೀನಿವಾಸ್ ವಡ್ಡರ್ಸೆ, ಸಾಮಾಜಿಕ ಹೋರಾಟಗಾರರು, ಉಡುಪಿ ಜಿಲ್ಲೆ.
Leave a Reply